.png "قوالب بلوجر معربة واحترافية مجانا")
حزب المبادرة هو حزب كمال مرجان إلي الناس الكل تعرفو لأنو خدم مع بن علي و شد وزير في أكثر من وزارة أخرها الخارجية و السيد هذا تذكر في وثائق ويكليكس إلي أظهرت أنو هو كان يمثل أحسن خليفة لبن علي بالنسبة لأمريكا.
الحزب هذايا إقتحم الفايسبوك و
عمل باج فان. باهي لحد لهنا و مثماش مشكل لأنو من المفرو ض و أنو الناس تعرف إلي السيد مؤسس الحزب هذا من رجالات الماضي و من بقايا النظام البنفسجي ولكن المفاجأة و أنو الباج هاذي تجاوز عدد الفان فيها 12000 في أقل من شهرين !!!
هنا تولي الأسئلة المطروحة هي هل أنو الفان إلي في الصفحة ميعرفوش إلي هي تابعة لمرجان ؟ أو أنهم يعرفوا و قابلين بيه؟ و كيفاش نجمت الصفحة تستقطب لعدد هذا من الفان في الوقت لقصير هذا؟
أنا نظن أ،و الناس إلي في الصفحة ميعرفوش أنو هي تابعة لمرجان ونظن زادة أنو فيها عدد لا يستهان به من التجمعيين سواء في إدارة الصفحة أو في الفان إلي ديما يشكروا فيها مأكا النوع متاع "يعطيكم الصحة أبهرتونا" و "أنتم أحسن صفحة في الفايسبوك" وأكا اللغة الخشبية متاع 7 نوفمبر و سيد الرئيس الله يخليك. الناس هذوما متاع التعليقات يعملوا على تغليط الناس وتحسيسهم و أنو الباج هاذي برسمي تهمها مصلحة تونس...
كذلك الصفحة هاذي خاصرين عليها برشا جهد و علاش لا فلوس لأنو كل يوم يهبطو زوز فيديوات على الأقل مأك النوع متاع "تونس لازمها مبادرة وطنية" و الفيديوات هاذي تتميز بكونها ذات جودة عالية مثل الفيديو هذا
ومبعد يبداو التجمعيين إلي حكيت عليهم يخدموا على رواحهم بالتعليقات الجميلة و يبرتاجيو الفيديوات و على الأغلب راهو كل واحد فيهم عندو زوز ولا ثلاثة حسابات في الفايسبوك و تيك تاك تنشرت الفيديوات و كبرت الصفحة و مزالت تكبر يوما بعد يوم .و الصفحة هاذي بالنسبة ليا أنا تمثل خطر كبير على خاطر بصراحة عنا برشا عباد في تونس عامة و في الفايسبوك خاصة "كلمة تهزهم و كلمة تجيبهم" و معندهمش وعي سياسي كافي بش يقرروا شكون ينتخبو و هذا يسهل من خدمة حزب المبادرة و كمال مرجان و غيرهم كيما جغام و فريكة و كان وصلوا الناس هاذم لمبتغاهم نقولو على الدنيا السلام و نكونو رجعنا كيف ماكنا قبل الزيادات .
0 التعليقات:
إرسال تعليق